شر عيطي

التراب أكثر من الحفرة و الحفرة قبر و القبر بالدم و الدم دم شهيد و شهيد و شهيد... قداش من واحد باش ندفنوه قبل ما نفهمو إللي الشر عيطي وفات و البلاد وقفت بيها الزنقة للهارب. و الجموع مازالت تتكالب على كراسي مسمرة و تتكى و تقولك لاباس با ولدي لاباس ما فمة شي فروخ إطرشق في البني بني!!! هكا بني بني!!! موتا و دمايات و ريوس مقسوسة و هو يقلي شر عيطي. تي علاش تحبني نسبك هكا في شهر فضيل تي الواحد ما ثدق لربي جاء سيدي رمضان قلنا باش نتلفتو للزوالي و نفرحوه تقوم هكا لا طاح لا دزوه إدخل في أمها غولا قال أش نوة إرها...هب هب و توة فقت سيادتك إللي يلزمنا نحاربوه!!! وينك كي جيناك قنالك راه البلاد في خطر قلتلنا هذيك ثقافة جديدة توة تشوفو العجب في رجب لا سيدي هانا شفناه في رمضان في النهار و القايلة...
و جاي توة تبكي و تعدد على ماتو الله يرحمهم و الحيين أش نعملو فيهم نقتلوهم هما زادة بالجوع. أش نوة ذنبو الزوالي في مشاكلكم السياسية أش يعمل الزوالي يشرب ماء البحر و ياكل الحشيش حتى تتحركو سيادتكم و تتواضعو و تخرجونا من أزمة أح...زاب تتعاركوعلى كرسي العرش. كي إنتوما ممحونبن بالكرسي خوذو الكراسي اللي في البلاد الكل و أخرجو علينا أتوة ناقفو لبلادنا و لزواولتنا. نقيمو الخبز اللي بيناتنا و ناكلو و نوكلو الكرش الجيعانة و نلبسو الساق الحفيانة و إنربيو الأجيال الجاية على ثقافة التسامح و السماح في اللي خذيتوه. و عفا الله عن ما سلف.
و كانك على شر عيطي خليها عندك أعمل بيها تمثال حطها قدامك و أقرأ عليها سورة البورداء. القليل حفا و تعب و حتى اللي عند يكمل في الشهر مسارقي بالصلاة و التكربيص. لا حاشتنا بمعارضة عاقرة لا أفكار واضحة و لا والو و لا حاشتنا بحكومة فاشلة لا مسؤولية و لا عهد و لا ميثاق. تمسها تيمع حسها تكلمها تقلك حققنا إنجازات!!! أش حققت يا سي؟؟؟ كان التفرقة و تقسيم البلاد لمسلمين و كفار. و الزولي كي الكورة بين الذكورة. ما ربح كان الوعود الفارغة و كلام البايت اللي لا يزكل و لا يشرب زعام كان تشردو في الناس و تخوفو في العباد.
اليوم المفال ماهوش سخرية على خاطر الوضع يبكي و ما يضحكش. و اللي صاير في تونس ما يفرحش. لا ما يفرحش...

أرقام قياسية
خارج عن المنهج داخل الحدث
و شكرا
حاتم جوهر.

منين نبوسك يا حكومة

لا الحق مسكينة الحكومة منتخبة بالشرعية متاكلة و مذمومة
لا ما يجيش الحق الحكومة مظلومة تخدم المغبونة صباح و ليل و غارقة للكرومة.
أه تقلي علاش غارقة نجاوبك. فب الديون إي أش بيه مولا التاج يحتاج.
ياخب الحكومة ماهيش توكل في الشعب، ما هيش ساهرة على راحة الشعب. 
ما هيش مواضبة على ضرب الشعب. ما هيش تسرق في الشعب.
إي و برة سرقت!!! تي هو المخلوع و سرق!!! خلي حكومة منتخبة و شرعية؟؟؟
أنا واحد من الناس نحبهم يسرقونا أما خير يسرقونا هما و إلا واحد براني يسرقنا
تي هما عملوا بالمثل الشعبي : اللي يسرق يغلب اللي يحاحي...
و زيد بربي حتى كان سرقوا تي هما أولى من غيرهم ما شدوش حبوسات؟؟؟
ما ظربوهمش بالمتراك؟؟؟ ما قعدوهمش على دبوزة. عملت كيفهم إنت كي تحب تولي كيفهم
إي لا ستنا هوني وين كنت إنت نهار أربعطاش جانفي كي البلاد الكلها شاعلة
قلت ديقاج ضربوك بالقاز. هزوك للداخلية. عطاوك طريحة نباش القبور.
تي ماك تتفرج في الززيرة. و تكتب على فايس بوك الحنين. تي إنت كافر تجمعي سملة العظيم الرحمان الرحيم.
لا و زيد عاملي فيها هكة معارض بالله في أش كون تعاض حكومة تعمل 66 كيف. أه شي هابط عليه نور من عند ربي و توة جاي تسب و تقشتل في حكومة عندها ترخيص
من عند المولى
لا تي شوف الإنجازات شوف المشاريع و الكياسات كيفاش ولاة. الزبل الملتلة أكوام أكوام و الناس داخلة للجوامع أفواجا أفواجا.
لا معطلين و عاطلين، وين ترى إنت في البطالة فين ريت واحد قاعد في قهوة و عندو شهادة عليا و لا حتى ديبلوم. تي اللي ما حصلشي بلاصة بعثناه يجاهد في سوريا إمالة.
و اللي رجع دخلناه للحبس باش يولي راجل. يا ولدي البلاد بخير ما تسمعش النبارة

أيا برة جيبلنا تريف حمص خلينا نبصوا على الشعب.
أرقام قياسية
كاراكوز في بلادي

طاحتلي الديموقراطية

أنا واقف نستنا و جاني واحد قالي خوية سامحني بربي ما ريتش ديموقراطيتي؟؟؟ قتلوا لا لاباس؟؟؟ قالي أنا واقف و ضربت على ديموقراطيتي ما لقيتهاش
قتلوا كيفاش يا ولدي زيد لوج مليح بالك نسيتها في بعض البلايص؟؟؟
قالي لا مالقيتهاش!!! قتلوا بالك في الدار خليتها و خرجت
قالي لا كلمت المرا قالتلي لا في الدار ما فماش ريموقراطيتك
قتلوا بالك خليتها في البيرو قالي لا حتى في البيرو ما فماش.
قتلوا ياولدي بالك سلفتها لحبيب و نسيت قالي تي لا يا راجل توة عندي مديدة و أنا نلوج و النافع ربي فص ملح و ذاب الأرض و كانت لها بلاعة
قتلوا بالك فمة أش كون سقطلك عليها
قالي أه!!! هكة ممكن ياسر
قتلوا كلمت المجلس التأسيسي، بالك يلقاولك ديموقراطيتك
قالي لا المجلس ما زال يكتب في الدستور ماهوش لاهي بديموقراطيتي
قتلوا كلم المنظمات العالمية الجامعة العار...أبية
ضحك و قالي تي وصلتها لمواصلها كلمتهم قالولي يا سيد ما تراش فينا لاهين في سوريا و إنت جاي تلوج على ديموقراطيتك برة للأمم المتحدة
قتلوا و مشيت؟؟؟ هزني حطني ستيل أش بيه السيد مترهز من كلامي و عمل هكة و خلاني و مشا يفركس في ديموقراطيتوا بعيد.
عملت هكة دخلت يدي لمكتوبي ضربت على ديموقراطيتي ما لقيتهاش.
تي هما موش يقولوا الديموقراطية تحضر و تغيب...

أرقام قياسية
كاراكوز في بلادي

نهضة نا!!!

نهضة نا!!! هكة قالي السيد غزرلي هزني حطني ثبت فيا مليح و بعد قالي الأخ نهضاوي قتلوا لا، قالي كيفاش لا تي عندك الشبيهة هاك عامل لحية و مستقيم ما تكون كان من نهضة قتلوا يا ولدي لا ما نيش من الهنضة!!! غزرلي هكة ستيل أش بيه ناكر في أصلوا!!! قالي ما تخافش رانا حصلنا الثورة و كتبنا دستور مضروب بالسافود و تكمنسينا في الكراسي و هبطنا للشوارع و شدينا المناصب و فرقنا جماعتنا في الحوم في الزناقي تي حتى من الزيقووات حطينا فيها أش كون؟؟؟ إمالة وينك. تي حتى من التجمعيين طهرناهم و دخلناهم لدين الله الحنيف، تي الجوامع إستعمرناها و دور الثقافة رديناها مدارس قرآنية واضحة. إملة وينك إنت إمالة فمة أش كون يقول لا تي إللي يقول لا تحطوه في قلبوا و نفرحوا بيه و إلا نكفروه إمالة فاش قاعدين نعملوا هوني ننحنا كان منكفروش اليساريين و العلمانيين تي حتى من الحاكم ييسناه و الجيش شوشرناه و كانك على الإقتصاد هذاك هدرة أخرى موش وقت أما نوعدك البلاد لاما نردوها سويسرة العرب. هات يخرج منها الغرب و نبيعوها للقطر تي أش قعد بربي أيامات و نتمكنوا من كل شئ و يبقى الكل حديث.

أرقام قياسية
كاراكوز في بلاري.

مهبول و زغرتولوا في وذن

تي لا السيد أنا حطيطوا باش ينورنا في المحافل الدولية ياخي السيد ولالي محسوب كاراكوز و بهذل بحالتنا في البلدان السقيقة و الصديقة و حشمنا قدام اللي يسوى و إللي ما يسواش
لا و إللي فاتك أغرب!!! إللي سي وخينا مولا الدار موس هوني. هازز علنا خشموا موش معبرنا تي كي يكلمنا ما يغزرلناش و لا يعبرنا. إجبدلوا إنت على الأمن يجبدلك على البذور!!! أحكي معاه على التشغيل يقوم يجبدلك على حقوق الإنسان، تره أحكي معاه على الدستور يبدا يخرفلك على زمان بو عنبة، تي حاول تشد صحيح و تحكي معاه في موضوع مهم يحكيلك على الحمص المنفخ و من بعد يقلك نفخوا و أشرب ماه. تره كلموا في التاليفون قال أش نوة تسأل على حوالوا يقوم يقول فيها وووه قال أش نوة شرعية و إنتخابات ما صبح، تي السيد دار السند و الهند ناقص كان باش يمشي لأفغانستان يمثلنا في المحافل الدولية. تي أحنا بعثناه يقضي و قلنا نعملوا على رواحنا و نخيوه السيد صورة هكة نزينوا بيها القصر كي راد علنا ربي و طلعت عضمتوا بلا فص... قام هكة شبشب علنا شعروا و حمر عينيه و قال أنا باش ناقف ضد كل واحد يشوهلي صورتي باهي صورتوا لمعناها و نحينا منها الغبرة و قلنا السيد سنة أولى حكم ميسالش. نعونوه ناقفوا معاه ناخذوا بيروا المغبون. ياخي دارلنا في الحياصة و غبر أهوكة التوة نحنا نفركسوا عليه في المراكز الثقافية و مراكز البوليسية و السبيتارات تي حتى من دول الشقيقة و الصديقة اللي متانس يزورها تطلبناها و شئ النافع ربي. بربي كان واحد شاف فيكم واحد شارد و يغزر للسقف و يحكي وحد كلمونا و الا حتى إكتبولنا. و إن الله لا يضيع أجر المحسنين.
أيه حط التونسية قالك فمة طرح بوكس.

أرقام قياسية
دولة الكاراكوز بلادي.

حرية التعذيب

يبدى الحرية قتلي نهج موش هكة و إنت سيادك عاملي فيها ثوري و فننان ملتزم بمبادئك و القيم متاعك ووه!!!! على القيم متاعك تعرف أنا القيم متاعك أش نعمل بيها في بلاصتك كي ندخل للتوالات نمسح بيها. كيفاش قتلي عملت ثورة و مديت سدرك للكرتوش. إمالة يا سيد إنت صرفت صرفت كمل مد حاجة أخرى بما أن العطاء عنك بالبالة... لا و رد بالك كان ماشي في بالك باش نخطاوك وإلا باش نفكوا عليك إنت تهز راسك وأحنا نعطيوك. يا نحنا يا إنت يا مقتول يا فر حبس...

واضح من عشاه يبان عواه. الجلاد هو هو و ضحية ما تبدلتش. سيبوا الأمور الكل اللي في البلاد و شدوا فرخ قال أش نوة إعتدا على الأمن و مس شعور الأمنيين. معقول!!! أما وين القانون وين حق الرد وين القانون فوق الجميع وينهم الحقوقيين اللي ساهموا في بناء دولة قانون مستقلة فيها اللي ياقفوا مع الزوالي و يظربوا عليه بالبونيا و يحاربوا على خاتروا... يظهرلي اللي تبدل في تونس اليوم الممثلين موش الوضح اللي زاد عقيدة على قدام.
لا حق و لا تعبير لا كتابي و لا حتى شفاهي كانك عاى الصحافة يرزيك فيها عن قريب ما قعدتك كان تنبر و تجمر في البايت... و كانك على الحقوقيين و الياساريين داخلينها كبة خارجينها قيام.
تي لا موس على حاجة أما كان جاء في بلاد أخرى راهي ولاة قضية راي عام موش قضية فنان عبر و تشد فيالحبس و الناسالكل طفات الضوء حقا حقا ما كاروش...
أية حل حل خليني نزوز

أرقام قياسية
بدون ضمار سنعود في عين حكومة الكاراكوز.

حديثك مع اللي ما يفهكش

تي لا موش على حاجة خليني نفسرلك الوضع
تي هي أش نية بوها تونس كان موش جماعة نبارة
تي التونسي انت تجيه منا هو يجيك من غادي انت تقول حمرة و هو يشد فالج و يولي عيرود و كشاكش تخرج
و يتخمرلك و يقولك لا أبدا يستحيل كحلة و نحط معاك ختار
و تولي انت تطلب في السماح و تحلف بالأيمان اللي انت غالط و ماكش بالعاني
غادي وين هو يكبش عاد نطيح و يولي مسيب كي سيدي بو قلادة بلا سلاسل

التونسي يموت على الوقت الضايع و كي تسأل فاش تعمل يقولك نقتل في الوقت
واذا لقيت خانس و ساكت أعرف اللي السيد ظارب السباط و ما لقاش دواء
و ساعات كي تلح عليه هكا بالكلام ينطق و يطرشق من أجناب و يخرج عاد القرينتا اللي فيه
و يولي عاد خبير في الاقتصاد و علم الاجتماع و في الكورة و في السياسة الحاصل التونسي منين اتدوروا يدور

أرقام قياسية
حاتم جوهر