نغمة

سارية فيا هازتني, صوتها واحل في لهاثي, شادتني نسمع فيها هازتني لخلاصي و ناقلتني في خيوط جميلة هازتني تصاور لخليلة و الحس اللي مارجني نغمة فيها كلام موزون ناحرني مسيب لوحال و شاددني نعشق صوتها في وذني و نخلق من صوتها فني نغمة مايحة مسلمتني عبد في سلاطينها رادتني, كيني مسحور, في بجوُدها و جِدها من جودُها مكسبني, حبيبها حبيبي, و نسها ناسي و نساتني روح الدم اللي على فراقها مارسني لا ننسى صوتها و لا نعشق غيرها ريحها ياسمين كليل و زعتر و شيح نغمتي إذا الشعب يوماً أراد الحياة فلا بدا أن يستجب القدر نغمة, هازة أطرافي و دافنتني, في تراكن قلبها دفنتني نغمة, سايبة هرهارة شقلابة, فيها الفزاني و فيها البياتي... نغمة الساكت و اللي مازال يعاني
نغمة العاشق الفاني و الزمان علمني حبها و وراني اش من ناس داست ترابها الهاني و اش من مرا مسفسرة تترشّق زعباني اش من صوت شُحرور غنى في مسرحها و طربني و بكاني و اش من فاس خدمة في صلبها و ابخيرو شبعني و سقاني اش من ترنان فيها زهّاني و دوعاجي خلالي كلام منقوش صواني نغمة القلم الصاين و على راسي سلطاني سيدي بن عيسى و سيدي شبعاني الزازية كحلة العين و الكاهنة اللي وراتني حر لوطاني شدني لنغمتها زين البلداني و شبني في عشقها, نطرت السماء و في بحرها مرجاني صحرا في سيتها و ذهب تبر غزالي نغمة ملصالحي للقبلي للودياني هرهارة عيونها كحيلة ساحراني خريرها غزير سرسابي في سطور كلامها ماعسني, قلتلهم خذوني رهين و نغمتها ما توقفوا عليها راهي تقتلني قالولي مهبول إتخرّف تهذي قلتلهم مهبول ببساطها الشادي في صدري و ماللي وذنيقلتلهم, إنخذرت ممحون ابسحرها و حرارة الروح الساكنة فيها قلتلهم نهذي للعالم اللي ماراش كيفي كحلة لغناجي قالوا كذبة و هذي جنة تحلم بيها؟؟ قالولي مجروح و جرحك ساري فيها قلتلهم نغمتها, كلام المالوف معزوف و جبة و بدعية و بخور عجعاجي إنادي لرجال الكاف و رجال بو عرقوب و ناس زمان سحرني شهامة سلاطين زمان بدعية و بلغة و بلوزة و بخنوق قالولي تحكي على أشكون؟؟ قلتلهم نحكي على قفة زعف و سواك و لوبان حنّة و مردومة وريشة الفنان صوّر سهول و أجبال سحاري و ملية و خلة و خلخال برنوس و عباية و كثبان نغمة من سرّك مدحوك و قال عزيزة يا أم الأوطان يا للات العرش و أم الأوطان

خارج عن الإطار الفنّي
حاتم جوهر